Pularvu

ஐக்கிய நாடுகள் மனித உரிமைகள் சபையை இலங்கை அரசு மதிப்ப தில்லை என்ற குற்றச்சாட்டு எழுந்துள்ளது. இலங்கையில் நடை பெறும் பல்வேறு மனித உரிமை மீறல்கள் தொடர்பில் கேள்விகளை எழுப்பும் ஐ.நா. மனித உரிமைச் சபைக்கு இலங்கை அரசு உரிய பதில்களை வழங்குவதில்லை என ஜெனிவாவில் தற்போது நடைபெற்று வரும் சபையின் 20 ஆவது கூட்டத் தொடரில் குற்றம் சாட்டப்பட்டுள்ளது.

இந்த ஆட்சியின் இலட்சணம் பற்றி நாம் சொல்லத் தேவையில்லை. பொலிஸ் அறிக்கையே படம் பிடித்துக்  காட்டுகின்றது.  கடந்த ஒன்றரை வருடங்களில் 781 ஆட் கடத்தல், காணாமல் போன சம்பவங்கள் இடம்பெற்றுள்ளன. வெள்ளை வான் கடத்தலின் பின்னணியில் அரசு தான் இயங்கி வருகிறது என  மாத்தறை மாவட்டப் பாராளுமன்ற உறுப்பினர் மங்கள சமர வீர தெரிவித்துள்ளார்.

தமிழ்நாடு அகதிகள் முகாம்களில் சுமார் 150 இலங்கை அகதிகளை காணவில்லை என தெரிவிக்கப்பட்டுள்ளது. இது தொடர்பாக, கேரள மாநிலம் விசாரணைகளை மேற்கொண்டு வருகிறது..

கற்றுக்கொண்ட பாடங்கள் மற்றும் நல்லிணக்க ஆணைக்குழு அறிக்கையின் பரிந்துரைகளை நடைமுறைப்படுத்துமாறு கோரி போராட்டங்களை நடத்தவுள்ளதாக நவசமசமாஜ கட்சி தெரிவித்துள்ளது.

யாழ். முகமாலை முன்னரங்கப் பகுதியில் கண்ணிவெடியகற்றும் போது கண்ணிவெடி வெடித்ததில் படுகாயமடைந்த மூவர் யாழ்.போதனா வைத்தியசாலையில் அனுமதிக்கப்பட்டுள்ளனர்.

மன்னார் மாவட்டத்தில் கடமையாற்றுகின்ற ஊடகவியலாளர்களுக்கு அரச தரப்பினரால் தொடர்ச்சியாக அச்சுறுத்தல்கள் விடுக்கப்பட்டு வருவதாக மன்னார் நகர சபையின் தமிழ் தேசியக் கூட்டமைப்பின் உறுப்பினர் இரட்ணசிங்கம் குமரேஸ் தெரிவித்தார்.

சுதந்திர ஊடக நிறுவனத்தில் இடம்பெற்றதாக குறிப்பிடப்படும் ஊழல் மோசடிகள் குறித்து புலனாய்வுப் பிரிவினர் விசாரணைகளை ஆரம்பிக்க உள்ளனர். சுதந்திர ஊடக நிறுவனத்தில் பாரியளவு நிதி மோசடி செய்யப்பட்டுள்ளதாகத் தகவல்கள் வெளியாகியுள்ளன.

யாழ். பொது வைத்தியசாலையில் இடம்பெற்றதாகக் கருதப்படும் அரச சொத்துக்களின் துஸ்பிரயோக சம்பவம் தொடர்பில், வைத்தியசாலை பணிப்பாளர் மற்றும் நிர்வாக உத்தியோகத்தர் மீது சந்தேகம் கொண்டு யாழ். வைத்திய சங்கத்தின் கிளை தலைவர் மற்றும் செயலாளர் ஆகியோரினால் யாழ். காவல் நிலையத்தில்  கடந்த 2ம் திகதி அன்று முறையீடு செய்யப்பட்டுள்ளதாக அரச வைத்திய அதிகாரிகள் சங்கத்தினால் அறிக்கை வெளியிடப்பட்டுள்ளது.

கைது செய்யப்பட்டு நீண்ட காலமாகத் தடுப்பிலுள்ள தமிழீழ விடுதலைப்புலிகளின் மகளிர் அரசியற்றுறைப் பொறுப்பாளரானன தமிழினிக்கு, புனர்வாழ்வு அளிக்குமாறு கொழும்பு நீதவான் நீதிமன்றம் உத்தரவிட்டுள்ளது.

யாழ். பல்கலைக்கழக கல்விசார ஊழியர்கள் சுழற்சி முறையிலான அடையாள உண்ணாவிரதப் போராட்டத்தை ஆரம்பித்துள்ளனர்.